23.1.16 (一)
最後一星期返工, 倒數新年四天難得的假期, 心情十分之興奮, 加上花紅已出, 梗係要賀一賀佢, 元朗區出名多美食, 想食餐精緻美味既菜式, 就揀左人氣頗高的壽司之神。
第一次黎, 就就揀左食最入門級既omakase set, 由師傅發辦, 提供當造時令食物, $600就有前菜, 壽司八件, 卷物一條, 湯同甜品, 第二度食唔到呢個價錢, 睇埋質素又如何先。
前菜係呢個茶碗蒸蛋, 一睇賣相就知唔簡單, 唔係連鎖壽司店出品可以相比, 佢用上渡蟹拆肉整成蟹肉絲, 加上日本矜貴既蒓菜, 同有食用金箔做裝飾, 貴氣十足, 蒓菜有層好似啫喱既野包住, 原來可以補充蛋白膠原, 蟹絲拆得夠細, 口感細膩, 蛋蒸得超滑, 加埋蟹肉既鮮味, 真係好好味!
食正宗既日本料理, 唔少得呢d小食, 而我就好喜歡呢d 小食, 全都是心機之作, 平時好少可以食到。日本溫室牛蒡爽口得來, 中間有少少藥材味, 甜蒜頭又係溫室的, 無左一般蒜頭既辛辣, 爽脆甜又有蒜香, 醋醃蘿蔔亦都是清爽開胃。
八件壽司分兩輪送上, 確保有足夠新鮮, 第一輪係石垣鯛、深海池魚同鰤魚, 擺放得靚靚, 之前睇報章話紫蘇葉同小花都可以食用, 同埋應該食添, 紫蘇葉有驅寒作用, 但我覺得佢個味太濃烈, 唔太接受到, 小花就可以食。
石垣鯛油份比較多, 配上酸汁, 可以解膩, 魚既油脂既香味, 好令人著迷, 一口一件, 大小剛好。
深海池魚肉質爽口, 比池魚味道無咁濃, 雖然有銀色皮看似好有魚腥, 但入口就無, 食到肉質甘甜, 師傅為佢配上柚子汁, 味道清新。
鰤魚係成年既油甘魚, 冬天當造, 較深色既魚通常味道較濃, 所以最後食, 鰤魚油份豐富, 口感有點似拖羅。
第二輪壽司有活北寄貝、伊左目、烤竹籤魚、中拖羅同燒銀雪魚。
師傅細心咁調配好每一樣既醬料, 唔需要再點豉油, 可以直接放入口食。
活既北寄貝, 係灰灰地色, 平時食既紅色北寄貝通常都頗靭, 但呢隻就唔會, 好爽口多汁, 充滿濃濃既貝味, 好清香, 好享受, 件飯係淺啡色, 沾上左醋汁但味道好輕, 唔會搶味, 飯量細細件, 剛好。
伊左目配左少少薑絲, 魚香味濃, 鮮甜, 口感軟身, 爽口。
烤竹籤魚又叫梳子魚, 配上少少薑蓉同蔥, 烤到外皮有少少熟, 焦香味濃, 頗特別。
中拖羅又叫赤身, 係吞拿魚背部, 油脂分佈平均, 散發着鮮甜香氣。
燒銀雪魚原來都可以做壽司, 配左辣薑蓉, 烤過, 魚肉滑溜, 有入口即溶之感, 美妙!
依依不捨的到左卷物部分, 有兩款, 一款係溫室青瓜加上紫蘇葉, 幸好紫蘇葉份量少, 味道唔重, 青瓜香甜味較突出, 好清新, 個赤醋飯都非常好味, 酸酸地有解膩作用, 第二款卷係赤身, 魚質滑溜香濃, 兩款同樣出色, 不分高下。
食完壽司手卷, 係時候飲碗湯暖一暖胃, 呢碗叫雪花煮, 充滿詩意既名, 內容都好特別, 有炸過既蠔、柚子皮、三葉、海藻、蘿蔔蓉、菇等, 味道好清新, 喝到食材的天然既味道, 調味非常輕, 已好足夠, 隻蠔炸完再浸入湯, 仍然有炸香過既味, 而且蠔味甚香濃, 食得出係來自日本既蠔。
甜品有抹茶雪糕同南瓜芝士布甸, 兩個人就剛好各選一款一齊食。
抹茶雪糕唔會溶得好快, 但亦唔會超硬果隻, 抹茶味道好濃, 卻無苦澀味, 亦唔會比奶味蓋過。
南瓜芝士布甸, 最特別係有粒巨型黑豆, 原來黑豆係日本過年必食既野, 寓意幸福, 適逢一月係日本過年月份, 又咁岩我地就黎農歷新年, 有幸可以食到, 可以幸福地過年, 南瓜芝士味既布甸香滑又夠特別, 芝士味輕但食得出來, 又有南瓜既甜。
每件壽司都極新鮮, 味道都調配好味道, 發揮到最大美味, 調味亦唔會過濃, 掌握得剛好, 熱食甜品每道菜都甚有心思, 六百多元可算超值, 食omakase, 黎元朗壽司之神就對了!
沒有留言:
張貼留言